القائمة الرئيسية

الصفحات

تخصصات مجال التسويق الالكتروني و المهارات اللازمة


تخصصات مجال التسويق الالكتروني و المهارات اللازمة






زيادة طلبات الشركات على التسويق الالكتروني بأنواعه وتخصصاته المختلفة وزيادة الوعي بأهميته وتأثيره زاد الطلب على العاملين في المجال ده خصوصا المتميزين منهم واللي عندهم علم وخبر وفكر مبدع ومختلف وفي المقال ده ان شاء الله هتناول شرح خمس مراحل و خطوات أساسية لازمة عشان تبدأ العمل في مجال التسويق الالكتروني.


المرحلة الأولى



هي التعلم فيجب أن يكون لديك المهام فنون التسويق بشكل عام ممكن تاخذ مثلا كورس المبتدئين او تقرا كتاب يعرفك المبادئ الأساسية للتسويق وطبعا أشهر كتاب مرشح في المجال ده هو كتاب فيليب كوتلر عن التسويق وكتاب ثاني حلو جدا برده مكتوب بلغه عاميه بسيطه اسمه الماركتينج بالمصرى حسام حسان.


 تاني شق الخاص بالديجيتال الأدوات والمجالات العامة للتواجد بشكل عام أون لاين من خلال الكورسات الكثير المنتشرة المجانية والمدفوعة ويمكن من أفضل الدورات التدريبية المتميزه للمبتدئين دورة مهارات التسويق الرقمي من جوجل وهي مجانية هسيب اللينك الخاص بها اسفل المقال, بعد كده ممكن التدرج في الكورسات على منصات ثانيه زي مثلا يوديمي او ليندا  او غيرها من المنصات و الافضل انك تحافظ على قراءة المقالات الدورية المنشورة في المجال والاطلاع بشكل مستمر على الجديد من المواقع المتخصصة مثلا زي سوشيال ميديا توداى وغيرها لانك لازم تكون عارف التعليم مش مرحلة ابتدائية لا ده عملية مستمرة على مدار حياتك العملية بما أن المجال يتطور بشكل سريع فلازم تكون طالع على الجديد.





المرحلة الثانية




هي اختيار التخصص مع التعمق في الكورسات والمقالات في مجال هتبدا تتوجه الى تخصص معين في التسويق الالكتروني لان الكثير ما يعرفوش ان التسويق الإلكتروني مش وظيفة واحدة أو اللي بيشتغل فيها مثلا بيفهم في كل حاجه لكنه يحتوي على تخصصات كثير من أهمها:


  • السيو (S E O)
  • الاس اي ام (S E M)
  • الايميل ماركتنج 
  • الاس ام ام (S M M)
  • الكود الماركتينج




خلينا نفصل ببساطة الفرق بينهم ومفهوم كل تخصص



1- أول تخصص هو السيو (S E O)  و هو اختصار (search engine optimisation) بمعنى تحسين الظهور في محركات البحث و ده المسئول عن تحسين الظهور لأي صفحة أو موقع في محركات البحث بشكل اورجانك او طبيعي دون اللجوء للاعلانات.


 لكن خليك عارف ان الوظيفه دي تحتاج وقت عشان تلاحظ نتائج مجهودك مش مجرد البحث باستخدام بعض الكلمات المفتاحية هترانك و تتصدر نتائج البحث.
الموضوع متعلق بفهم وتحليل وتوقع سلوك المنافسين كمان لازم تكون عارف انه شرط اساسي لنجاح و احتراف السيو هو جودة المحتوى نفسه ماينفعش محتوى مفهوش اي قيمة مضافة يتصدر لأنه ببساطة محركات البحث بتقدر تحلل سلوك المشاهدين او القراء وبتعرف من خلالهم هل المحتوى أضاف ليهم خلال استمرارهم في المشاهدة او القراء خرجوا بسرعة لان هم ما لقوش اللي كانوا متوقعين و بيدوروا عليه كمان بيكون من مهام وظيفتك هو تطوير المحتوى بشكل مستمر علشان تفضل وتصدر نتائج البحث.


2- الاختصاص الثاني هو الاس اي ام هو اختصار Search Engine Marketing وهو ببساطة الظهور في محركات البحث لما المستخدم أو العميل يكتب كلمات دلالية معينة لكن الظهور ده بيكون بشكل مدفوع اللي هي الاعلانات اللى بتظهر لما بتبحث عن منتجات.
تعتبر وظيفة ال Search Engine Marketing شبيهة بالسيو اللي اتكلمنا عليها في النقطه السابقه لكن بشكل مدفوع بعكس الاولى وهي تحسين الظهور بشكل مجاني.


3-التخصص الثالث هو السوشيال ميديا ماركتنج أو (SMM) وفي الغالب ده التخصص الشائع وهو التسويق على منصات التواصل الاجتماعي والشركات عموما بتلجأ للنوع ده من التسويق لأغراض متعددة من أهمها تحسين التواصل الفعال مع العملاء الحاليين لزيادة الوعي مثلا بالعلامة التجارية وانتشارها و الوصول لعملاء جديدة و تحقيق مصداقية وثقة اعلى من خلال التواجد الفعال على سوشيال ميديا وساعتها هتكون وظيفتك التواصل المباشر مع العملاء والرد على تعليقاتهم و تحليل سلوك العملاء وتحديد عميلك المثالي و تقديم محتوى يتناسب مع اهتماماتهم ممكن تشتغل من أي مكان لكن هيكون عليك الكتابة أو الإدارة بشكل مستمر 24 ساعة سبعة أيام في الأسبوع وتحديث المحتوى بشكل دوري كمان مطلوب منك تتابع الترندات بشكل مستمر وتواكب المحتوى المتقدم المتناسب مع الترندات دي.

4- التخصص الرابع هو الايميل ماركتنج وهو التواصل مع العملاء الحاليين والمحتملين من خلال الايميل ولا زال الايميل ماركتنج بيحقق نتايج كويسة جدا و بيعتمد عليه شركات ومواقع كثير.


5- آخر تخصص هو الكونتنت ماركتنج أو التسويق بالمحتوى وهو بيهدف انك تكسب عملاء جديدة للنشاط الخاص بك أو المجال اللي انت شغال فيه من خلال تقديم محتوى قيم في اشكال متعدده زي فيديو او مقال او حتى بوستات على السوشيال ميديا.

المجال ده في رأيي من اقوى المجالات اللي شايفها واعدة في التسويق الالكتروني لانه ببساطه مش بيتكلف كتير و بيحقق نتائج كبيرة جدا و بيبني الولاء عند العملاء.
لازم يكون عندك فكره ابداعي وقدرة على تقديم الجديد و فهم احتياجات العملاء في المجال اللي انت شغال فيه مع قدر من مهارة الكتابة والتواصل بلغة العملاء.
لازم يكون عندك مهارات تحليلية تعرف ايه اللي بيجيب تفاعل واي اللي مش بيجيب و تكون ملم بالكلمات الدلالية أو المفتاحية وتعرف ازاي توصل المحتوى للي بيدور عليه دي الخمس تخصصات الأهم في مجال التسويق الالكتروني طبعا انصحك انك تخصص في حاجه واحده او اتنين بالكتير وتديهم اهتمامك وتطور فيهم نفسك باستمرار لانه ببساطه بتاع كله اللي شغال في كل المجالات قليل لما بيحقق نتائج كويسة او بيتميز في اللي هو بيقدمه.



المرحلة الثالثة


وهي اكتساب الخبرة في الاول محتاج تشتغل فتره ببلاش تتدرب في شركه او حتى لاي حد من معارفك عنده بيزنس ومحتاج يسوق الكتروني لنفسك بتاعه ولما توصل لمرحله معقوله تقدر تشتغل في شركه او مكتب تسويق فتره لحد ما تكتسب خبرة في مجالات متعددة وتتعلم طريقة التعامل مع العملاء وإدارة الموظفين والدورة المستندية الخاصة بالشركات و المهارات الإدارية المختلفة.



 المرحلة الرابعة 



هي التسويق الشخصي او ال"Personal Branding" في الفترة دي يفضل انك تبني brand شخصي قوي  بمعنى انك تكسر انتشار ومتابعين اون لاين ودي ليها درجات كثير من أول من التقدم مقالات وبوستات تعليمية على فيسبوك مثلا لحد الفيديوهات التعليميه انا شايفها من افضل و اسرع وسائل انتشار بناء البراند الشخصي و جمهور متابعين انك تشارك معرفتك وخبرتك ومعلومات مع الغير و تعمل علاقة الثقة بينك وبين الجمهور و هو ده التسويق بالمحتوى اللي ذكرته فوق.
ممكن حد يقولي ازاي اشارك خبرتي ومعلوماتي من غير ما اكسب ازاي اعلم الناس بلاش اقول لك انه مش كل الناس عندها القدره انها تتعلم فضلا عن أنها توظف اللي اتعلمته عن النشاط بتاعها وتغامر بفلوس لكنهم بيحسوا بأتقان المحاضر او اللي بيقدم الفيديو ده من خلال المعلومات القيمه ولا ان يشاركها وبيكونوا حابين انه هو اللى يتولى العملية من اولها لاخرها او على الاقل يتواصل معاه في استشارة مدفوعه او قرص تعليمي مفصل و مباشر.
ممكن تقول ان في ناس ممكن تتعلم وتدخل تنافسني في المجال بتاعي هاقولك ثاني زكاة العلم نشره وطول ما انت بتطور نفسك وبتقدم قيمة كويسه انت ببني جمهور وعملاء و بتكبر كل يوم.



المرحلة الخامسة


هي بناء كيان أو شركة ودي المرحلة الاخيره اللي بنصح بيها جدا دايما مش بحب الوظيفة وبشجع الناس دائما أنهم يبنوا البزنس الخاص بهم.


في حد ممكن يشوف نفسه مش مؤهل أو يصنف نفسه او غيره ما ينفعش يدير مشروع لكنك كنت من فتره ما تعرفش حاجات كثيره عن التسويق الالكتروني لحد ما اتعلمت ومارست واتدربت وبالتالي تقدر تتعلم برده عن إدارة المشروعات والأنشطة التجارية.


فكرة الطبيعة الشخصية اللي ماتنفعش تدير أو تمتلك مشروع انا بصراحه مختلف معها كونك كونت خبره معقوله في المجال وشفت خلال حياتك الوظيفية ادارة الشركات بالاضافة الى انك كنت بتتحمل مسؤولية والمطلوب منك اتخاذ بعض القرارات المتعلقة بالشغل في الوظيفة وبالتالي انا مش شايف اي فرق أي مهارة تقدر تتعلمها مع الوقت والممارسة.





في النهايه اتمنى لكم كل التوفيق واتمنى يكون المقال اضافه لكم شكرا لكم سلام عليكم.


هل اعجبك الموضوع :